Day 5 - 姬路城 & 元町商店街 & 神戸港

第5日, 已經係行程既一半.  今日一樣要跑到好遠.  第一站係 姬路城,  姬路城係 3月先啱啱完成長達5年幾既維修, 當然馬上去睇睇啦.

由大阪去姬路, 可以坐新幹線, JR Kansai Wide Area Pass 包的.  但要從 新大阪駅 坐新幹線, 由  なんば駅 去 新大阪駅 呢程就坐地鐡御堂筋線吧.

國寶

又係世界遺產

遠觀, 又一個落雨既日子

從天守閣望出去

行行行, 終於到天守閣最高層

雖然天氣唔好, 但姬路城真係好靚

離開咁靚既姬路城, 坐返 JR 去神戸, 喺元町駅落. 去食午餐.

ビーフシチュー定食 (燜牛肉定食) 2350円

呢間 洋食 ゲンジ 係睇旅遊書既.  坦白講, 旅遊書好多都係伏, 但呢間真心覺得好食, 牛腩超淋, 完全唔駛咬.  麵豉湯就似開水即沖嗰啲, 套餐包埋就飲埋佢囉.  嗰日係星期三, 冇乜人, 只有兩三個日本人, 可以安安靜靜咁食飯, 真舒服.

食完午餐就順路行下元町商店街, 不過嗰日好多店舖都定休, 冷清清咁. 只怪自己冇事先做好資料搜集, 殘念!!

既然冇嘢行, 咁就快步去神戸港, 那邊有商場, 又有震災記念公園, 神戸港塔.

先去咗 Mosaic 行街, 見到有妖怪手錶專門店呢.

路過麵包超人館, 冇入去, 因為太多太多小朋友了, 好恐怖!!

唔入館, 就去咗樓下買麵包, 好多款, 款款都好得意.  其實仲好飽, 但唔買對唔住自己, 就當晚餐吧.

買咗一咸 (漢堡) 一甜 (豆沙)

買完麵包, 遇著一團香港旅行團剛到, 馬上閃人去神戸港塔.

吹住海風, 慢步去震災記念公園

行到去遺址, 遇著潮漲......orz 只見到歪斜既燈柱, 但仍感覺到當時地震既威力.

坐咗一陣, 諗住等潮退, 但啱啱先漲, 有排都未退, 都係離開吧.  下次有機會再去.

行返去 JR, 經過南京町, 係日本三大中華街之一.  不過係我唔認識既中華, 全條街都係大紅燈籠, 對眼好辛苦, 哈哈!!

長安門入

好可愛既熊貓

影得唔好, 其實係十二生肖石像

西安門出

返酒店途中, 經過見到炸雞&雞翼好似好好味咁, 又有人排隊, 咁當然排埋一份, 撗掂兩個麵包唔會夠, 加餸.

負責賣雞嗰女仔, 一聽見我講英文, 嚇到手震口震, 夾雞入袋封口, 全程手震勁緊張.  但我只講咗 100 grams (手指指個炸雞), 2 chicken wings (都係手指指個雞翼, 再加個V字手勢), 我自問個樣都好和藹可親架, 唔駛驚喎......

只影咗招牌, 炸雞&雞翼冇俾手機先食, 骨都冇得佢食呀

只知道名古屋出名雞翼, 但買嗰時完全因為條人龍, 唔知呢間乜東東.  返到酒店先食, 凍咗都好味, 下次見到要再食.

是日雪糕, 係 LEMON PIE 味. 有啲似之前出既柑橘柚子雪糕咁, 都係 VANILLA 雪糕, 加啲 LEMON PIE 醬咁, 不過不失吧.

下一頁: Day 6 - 三ノ宮生田神社 & 紀伊勝浦駅
上一頁: Day 4 - 天橋立