Day 6 - 三ノ宮生田神社 & 紀伊勝浦駅

嚴格嚟講, 今日係冇行程架, 因為要用半日時間去和歌山.

雖然冇乜行程, 早上都要出去行下.  因為太早 (9 點), 所以先去神戸三ノ宮生田神社.  平日既上午, 又係冇乜人.

行完神社, 過咗對面的 Tokyu Hands, 不過冇嘢啱買.  於是行去 Kobe Plaisir 諗住食個 Early Lunch.  原本諗住係淡季, 平日, 上午 (11點), 一個人, 應該 walk-in 都有位, 點知全場已經 fully booked, 冇得 walk-in!!!!!! 點解可以一啲 walk-in 位都唔留架!!!! 唉, 唯有下次啦.......想去試既朋友, 記得上網 book 定枱先呀.

落緊雨, 喺條街度周圍睇下邊間價錢 ok, 而又有得食神戶牛.  最後揀咗喜山, 味道ok, 不過件牛就...... 咬唔開架, 我要直接吞落肚!  話說前幾日食既近江牛, 人哋都係半生熟, 但入口即溶, 點解呢個就咁架.  冇諗過喺日本都會中伏!!

呢餐神戶牛唔得, 即去食雪糕安慰下自己先.  呢間雪糕係上年東京台場試過, 覺得好好味, 係大阪見到再食.  今次去神戶都俾我見到佢, 咁有緣份, 當然要會一會佢啦, 呵呵呵.

一個人食 regular size double, 勁滿足

因為落大雨, 喺雪糕店 hea 咗一陣, 見細雨少少就即閃.  唉, 個天係咪唔鐘意我, 做乜日日都落雨架!

下一個目的地係和歌山 紀伊勝浦駅.  要去嗰度瞓一晚, 方便第二朝去熊野那智大社.  由三ノ宮去紀伊勝浦, 要喺新大阪轉車, 兩程車要 4個幾鐘, 未坐已經覺得腰酸背痛啦.

去新大阪好快, 新快速只要25分鐘左右.  但下一程特急都要坐差唔多 4個鐘, 當然要買定嘢上車食啦.  未試過豚饅, 買兩個試下.  勁多日本人排隊, 仲要一買買好多盒 (一盒8個喎) + 燒賣, 似係出完差回去既手信.

唔難食, 不過又係我唔認識既日式中華豬肉飽

JR 特急去紀伊勝浦途中, 經過海邊已經停雨.  望出窗竟然有彩虹, 仲要由個海面開始.  咁大個人, 未見過咁大條彩虹, 好震驚, 當時心情即刻大好.

行咗十分鐘, 又山又隧道都仲見到, 我仲聽到隔離位台灣老婆問老公影唔影到, 當時我坐右邊窗口, 佢老公坐左邊窗口, 咁即係條彩虹橫跨兩邊?!  半圓?!

天光坐到天黑, 終於到了.  其實當時未夠 7點, 不過所有店都已經關門.

住查曼特酒店, 離車站好近, 5分鐘就到.  因為唔滿, 所以我對面隔離都冇人住, 好安靜舒服.  我覺得係店主特別安排隔開的, 好有心啊.

Welcome soup, 年糕紅豆湯

放好行李, 有出去行咗個圈, 睇下有咩晚餐食.  未關門既全部係日式定食之類, 我又唔太肚餓, 食唔落成個飯, 所以就食咗個 welcome soup 就算啦.

是日宵夜, 係和牛味既薯片......說好的神戶牛呢????

P.S. 整日行程都係食食食...

下一頁: Day 7 - 熊野那智大社 & 串本海中公園
上一頁: Day 5 - 姬路城 & 元町商店街 & 神戸港