Day 3 - 滋賀 近江八幡 & 彦根城

今日早起出發去滋賀, 第一站係 近江八幡.  由京都 JR 去只要 30 分鐘左右, 好近.  出咗 近江八幡駅, 先坐巴士去 大杉町 站, 再行過去 日牟禮八幡宮.

那天星期一, 只得小貓三四隻, 好寧靜, 好鐘意呢種感覺.

第一次見 '巫女' 真喺掃地

我鐘意睇大樹, 仲要係幾百年, 過千年就最好.  感覺好有靈氣, 身心都好舒暢.

日牟禮八幡宮 比想像中細, 只係行咗半個鐘左右.  跟住就過隔離坐纜車上山. 去睇琵琶湖.

成架纜車得我一個, 好耶, 包車!

沿路上山, 有好多地藏菩薩.

先去咗 瑞龍寺.  上去既時候, 得一對日本人夫婦啱啱行完落山, 我上到去, 只得一個嬏嬏打掃中.  入寺要 300 YEN, 但冇人收錢, 要自己放入箱.  我一開始冇為意要入場費, 直接咁行咗入去, 係個嬏嬏叫返我轉頭, 佢不停咁同我講日文, 一頭霧水!  指示又只有日文, 只識睇 300 YEN 幾個字, 哈哈!

由寺內望出去, 見到少少琵琶湖

行完 瑞龍寺, 就繼續上山.  那天係陰天, 好彩冇落雨, 靜靜咁一個人行, 冇人打擾.  (話說成段山路都冇人, 天陰陰地濕濕咁, 好驚叉錯腳轆落山, 應該會叫天不應, 叫地不聞!)

雖然沒有太陽, 但視野還好, 清楚望到田野, 及最重要的琵琶湖

其實想喺山頂留耐啲, 因為風景好靚, 又有少少風吹下, 好舒服.  但奈何好多蚊, 又只得我一個供應食物俾佢哋, 所以只好急急腳走人囉.

落返去纜車站, 有手信店, 買支士多啤梨雪條食下先.  佢似 sherbet, 有士多啤梨肉喺面, 好味道.  仲有芒果味, 下次見到要試埋先得.

包包你喺邊度呢?

坐纜車落山, 個天光返少少

落咗山, 先去 Club Harie 買年輪蛋糕.  見好多 blogger 寫好食, 咁當然要試下啦.  因為係一大個, 自己食唔晒, 返到香港先試.....um.... 唔知係咪唔係新鮮即食, 感覺跟其他日本年輪蛋糕唔大分別.  唔難食, 但係咪必買就見仁見智啦.

係時候午餐, 近江牛咁出名, 我又係牛精, 當然係食近江牛啦.  選咗試 まるたけ近江牛　近江西川, 其實仲有好多間出名食近江牛的餐廳, 不過 近江西川 係沿路上, 咁就腳就食佢啦.

一個人冇法 shabu shabu, 咁唯有叫定食, 約 4000 yen 左右.  但超好味, 牛肉好嫩滑, 一啲筋都冇.  右邊中間應該係牛腩, 勁淋, 入口即化, 超值!

時間是上午11點, 太早, 又係星期一, 冇人, 包廰

好滿足之後, 選擇行下, 運動下幫助消化.

有日本人影婚照, 著傳統白無垢架

行返去 大杉町站 坐巴士返 近江八幡駅, 下一站係 彦根城.

去到剛好有彦根貓表演, 當然睇咗先啦.

由天守閣望出去的彦根港

剛好有學生上體育堂, 真係會大叫口號架

遠望彦根城

離開彦根城, 見到有 彦根牛 炸薯餅, 又食.  唔太見到有牛肉碎, 不過本身個薯餅都好好食.

一路行返去 彦根駅, 見到間好古舊既店鋪, 感覺返咗去五六十年代咁.

是日晚餐, 又係超市/車站胡亂買一通

聽日就要搬酒店去大阪, 同埋又要早起去天橋立, 早啲收拾瞓覺囉.

下一頁: Day 4 - 天橋立
上一頁: Day 2 京都 - 比叡山延暦寺 & 祇園四条