跟住就去搭巴士 比叡山ドライブバス, 上 比叡山延暦寺. 第二日開始就落雨/陰天, 前一天既陽光好似發夢咁.
坐咗巴士一個鐘多啲, 喺 東塔 落車, 上車前已經落緊雨, 未停過. 又霧又雨, 仙景咁. 但其實我要著雨褸, 又要拿遮, 又要影相, 仲有風有雨有霧, 好狼狽.
東塔 嗰邊有 根本中堂, 文殊樓, 大講堂等. 原先行程係 東塔→西塔→橫川, 但越來越大雨, 越來越大霧, 乜都睇唔到, 路又濕滑, 所以行完東塔, 我就諗住巴士上山頂, 再坐巴士落返京都駅. 今次去唔到, 就留返下次, 俾藉口自己再去囉, 嘻嘻.
上到山頂, 橫風橫雨咁. 當時 11 點幾, 望下巴士時間表, 以為 12 點有巴士落返去京都駅, 就諗住入間餐廳問下有冇嘢外賣上車食. 點知問下店員, 佢話下一班巴士要 2 點, 12點嗰班只係落返去延暦寺!! 當堂晴天霹靂, 冇理由坐喺餐廳到 2 點架. 好彩日本人真係好好人, 個店員橫風橫雨咁都衝去對面攞本小冊子俾我, 教我搭纜車落山. 其實佢一直同我用日文講 CABLE CABLE 咁, 但我聽唔明, 佢頂唔順我先去攞小冊子. 哈哈, 真係好感激佢呢.
 |
| 山頂望出去, 白濛濛一片 |
最後都無驚無險咁落到山, 再轉京阪電車去出町柳駅. 原先都係安排去 祇園四条 茶寮都路里 食晚餐的, 既然已經到咗, 咁就提早食午餐啦. 悠悠閒閒咁行過去, 天呀!! 超多人, 已經排到出門口再轉彎!! 目測二三十人, 仲未計店舖入面喎. 咁我當然唔等啦, 走去食雪糕就算.
 |
| 其實本人唔太好綠茶, 不過佢個雪糕又真係好好味, 唔會苦, 但又充滿綠茶香味. 加上紅豆, 白玉, 完美組合! |
食完雪糕, 就去花見小路行下. 一直都未停過雨, 真佩服仲有人著和服嚟行街影相. 話說上年我都著過和服, 只係半日已經好累, 又唔敢食唔敢飲 (驚整污漕&要去洗手間), 行路又辛苦, 碎步上上落落咁.
一直向四条駅方向行, 沿路有好多店舖, 漬物, 菓子, 藥妝, 百貨雜物, 大丸, TOKYU HANDS... 當然仲有好多嘢食. 雖然落雨, 但都好好行, 必定滿載而歸.
最後我轉入錦市場, 食個下午茶. 見到好多人買章魚燒, 就食佢啦. 到我既時候啱啱賣晒, 要再整, 新鮮熱辣咁. 雖然本人係貓舌要吹涼, 又唔記得叫佢走木魚, 不過無損佢既美味.
沿路買咗太多嘢, 一袋二袋咁, 唔太方便入餐廳食飯, 又係大丸見到有桃 (當時已經9月, 開始賣柿了), 咁晚餐就變咗大雜會. 個桃真係又甜又多汁, 同喺香港食真係唔同啲.
題外話: 相中的桃味酒, 只含 3% 酒精. 本人平時係滴酒不沾的, 以為 3% 應該 OK, 點知暈咗成兩個鐘!! 但佢好好味, 香甜桃味但又冇酒精苦味, 好想再飲. 唯有下次同包包 SHARE 啦.
上一頁: Day 1 出發 - 京都
下一頁: Day 3 - 滋賀 近江八幡 & 彦根城
沒有留言:
張貼留言