去到行程第8日, 安排咗去奈良睇鹿.
出發前, 先食個簡單既早餐. 呢幾日食咗好多飯團.
 |
| 太陽 Tropicana 好好味 |
選擇咗搭 近鉄 去 近鉄奈良站, 因為行去奈良公園既話, 比 JR 近好多. 一入到奈良公園, 已經有好多鹿啦.
我第一時間, 當然係去買鹿仙貝喂佢哋啦. 佢哋一見到手上有鹿仙貝, 即刻走埋嚟, 咬袋, 頂 PAT PAT, 舔手, 扯衫乜都做齊, 務求有得食. 只要俾佢哋食, 就會任你摸. 哈哈, 真係現實. 雖然我都係因為想摸佢哋而買咗 3 PACKS 鹿仙貝, 呵呵呵......
 |
| 好多鹿圍住賣鹿仙貝既舖仔 |
其實奈良公園好大, 我選擇咗行3個點, 第一個係 興福寺. 但興福寺唔可以影相, 只能夠影出現既五層塔.
跟住就行過去春日大社, 會先經過春日大社參道. 樹蔭下行, 好舒服.
唔知道係咪啱啱維修完, 春日大社好新, 仲好紅. 太陽下佢一片橙紅, 好火啊!!
佢有一間黑房, 放滿點著既燈, 燈光飄逸, 好迷幻. 因為唔識日文, 入去前唔知係乜, 一打開門見到咁多燈火, 即刻覺得好驚訝, 好讚嘆, 好多人同我一樣, 立即嘩咗一聲添! 有機會去既朋友, 一定要入去睇睇. (因為太黑, 手機乜都影唔到, 殘念)
 |
| 好得意既大樹. 呢條係出口前必經之路, 每個人都要穿過呢. |
 |
| 鹿呀鹿, 你會唔會太過識嘆呢 |
最後當然要去奈良公園既主角, 東大寺啦.
佢係全世界最大既木造建築, 真係好宏偉. 寺入面係好多唔同既佛像, 觀音等等. 全部都好巨型. 嗰日係星期六, 又好好天, 所以勁多人, 當地/外地遊客, 中小學生都有, 全部集中喺東大寺.
行完東大寺, 已經係一點幾, 係時候去食午餐. 去食好多 BLOGGER 介紹過既 おかる. 雖然我好肚餓, 但一個人要 KO 晒真係有啲難度, 最後要打包半個大阪燒當宵夜.
 |
| 明石燒 好味 |
食飽就去 AEON 行下. 之前睇 BLOG, 有人介紹過奈良有間 Aeon Big Extra, 喺 JR 奈良不遠處, 話超大間, 所以今次就加咗佢入行程. 但我低估咗佢既路程, 又高估咗自己既搵路, 喺迷路加上雙腳行到痛死, 越行越慢既情況下, 我行咗超過45分鐘先到!!!!!!!!!
雖然佢真係好大間, 但其實賣既嘢同其他細分店/超市都差不多, 最後我只買咗一盒枝豆 & 一支好難飲既綠色可樂. 究竟我咁辛苦為乜!!!!!!
 |
| 勁難飲, 我只飲咗一啖就頂唔順啦 |
好彩喺 JR 站, 買咗大佛布丁當飯後點品, 好好味啊!!!! 以我唔太好布丁都覺得佢好好味, 咁佢真係超好味架啦. 大家一定要試下.
 |
| 盒飲品喺便利店買, 藥水味架, 中伏 |
 |
| 奈良壽司, 材料已經好夠味, 完全唔需要其他醬料 |
 |
| 傳說中既枝豆當宵夜 |
冇食雪糕, 我竟然冇食雪糕, 行咗成日, 熱咗成日, 我居然冇食雪糕, 天呀呀呀呀.......
聽日係最後一日, 我點都要食雪糕!!!!
上一頁:
Day 7 - 熊野那智大社 & 串本海中公園
下一頁:
DAY 9 - 心斎橋 & 歸家啦
